അലൈന്‍ , എത്ര ഭംഗിയായാണ് ആ പട്ടണം രൂപകല്‍പന ചെയ്ടിരിക്കുന്നത് . ഈ മരുഭൂമിയിലെ മനോഹരമായ മരുപ്പച്ചയാണ്‌ അലൈന്‍. പ്രപഞ്ച പരിപാലകന്‍ പലതും നല്‍കി ഇമറാത്തികളെ അനുഗ്രഹിച്ചു, എന്നാല്‍ അവര്‍ക്ക് നല്ല പ്രകൃതി ലഭിക്കാനുള്ള അനുഗ്രഹമുണ്ടായില്ല. എങ്കിലും ദൃഢ നിശ്ചയമുള്ള അവിടത്തെ നല്ലവനായ ഭരണ നായകന്‍ ആ നാടിനെ മരുഭൂമിയിലെ മരുപ്പച്ചയാക്കി മാറ്റി. ഇമാറാത്തില്‍ രണ്ടു സ്ഥലങ്ങളാണ് എനിക്കേറെയിഷ്ടം . അലൈനും ഫുജൈരയും. അലൈനിലേക്ക് പോകാന്‍ ഞാനെപ്പോഴും താല്പര്യം കാണിക്കുമായിരുന്നു. അബു ദാബിയിൽ നിന്നും അവിടേക്കുള്ള വഴിയിൽ ഹൈവേയിൽ ഇടയ്ക്കിടയ്ക്ക് ഫാം ആക്സസ് എന്നുള്ള ബോർഡ് കാണാം. ആ വഴിയിലൂടെ പുറത്തിറങ്ങിയാൽ കുറച്ചു വണ്ടിയോടിക്കഴിഞ്ഞാൽ നമുക്ക് കൃഷിയിടങ്ങൾ കാണാം. വേലികെട്ടി തിരിച്ചിരിക്കുന്നു വലിയ പറമ്പുകളായിരിക്കും അവ. മിക്കവാറും പാകിസ്ഥാനി, ഇന്ത്യക്കാരൻ, ബംഗ്ലാദേശി അല്ലെങ്കിൽ ഈജിപ്തിലെ സഈദികൾ ആയിരിക്കും അവിടെ കൃഷി നടത്തുന്നവർ.അവരോടു അനുവാദം വാങ്ങി മിക്കവാറും നമുക്കവിടെക്കു പ്രവേശിക്കാൻ കഴിയും.
